Link açıqlığı

İşğal etilgen Keriçte Qırımnıñ diger şeerlerinde olğanı kibi para bozduruv noqtaları qapatıldı. Qırım.Aqiqat mühbiri bildire ki, bu Milât bayramlarına yaqın oldı.

Şeer sakinleriniñ aytqanına köre, yanvar 6-dan itibaren bir çoq para bozduruv noqtası qapalı.

Malüm olğanı kibi, 2015 senesi yanvar 1-den itibaren işğal etilgen Qırımda Rusiye qanunlarına köre para birlemini yalıñız bank bölüklerinde satın almaq ya da satmaq mümkün.

Aqmescitte para bozduruv noqtaları yanvar 1-de qapatıldı.

Qırım «baş naziri» Sergey Aksönov para bozduracaq noqtalarnı «Qırımda başına belâ qıdırmamağa» çağırdı.

Rusiye banklarınıñ vekilleri bu sene Qırımda «Ukraina zamanında» çalışqan bir buçuq biñ para bozduruv noqtasından iç birisi çalışmaycağını bildirdi.

«Rusiye bankı» müdiriniñ muavini Mihail Suhov dedi ki, turistlerniñ çoqusı Rusiyeden kele, olarğa ise para bozdurmaq kerekmey, onıñ içün para bozduruv noqtalarına ihtiyac yoq.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG