Link açıqlığı

Refat Çubarov: istilâcı memleketlerni toqtatmaq kerek, o vaqıt terrorizmniñ diger şekillerini yoq etmege qolayca olur


Qırımtatar Milliy Meclis reisi Refat Çubarov «Frenkistan halqına ve saf göñülli insanlarğa» «Charlie Hebdo» mecmuasınıñ muarririyetinde oğan terroristik ücümi sebebinden öz taziyelerini bildirdi. «Novıy regoin» bergen malümatqa köre, yanvar 8 künü, cumaaqşamı, Refat Çubarov Frenkistan elçihanesi yanında gülçemberlerni qoydı.

«Pariste yüz bergen vaqia bizlerni şaşırdı. Çeşit millet ve din mensüpligi olğan insanlarnı. Terror ve onıñ aqibetleri muthiş bir şey. İnsan aqları, söz serbestligi, – er yerde riayet etilmeli. Olarnı kimse bozamaz. Amma biz aqiqatnı aytmalımız: dünyada devlet terrorizmi olğan vaqıtta, o terrorizmniñ diger şekillerine de negiz olacaqtır. Şu cümleden, maqsadını din tarafından aydınlatqan terrorizm içün de. Bu – islâm terrorizmi degildir. Devlet terrorizminiñ şeklidir, ukrainliler, şimdi frenkler de onıñ qurbanları oldı», – dedi Refat Çubarov.

«Birinci nevbette, biz BMT beyanatnamesinde, halqara uquqlarda yazılğan qaide ve maddelerge riayet etmelimiz. Biz istilâcı memleketlerni toqtatmalımız, o vaqıt terrorizmniñ diger şekillerni yoq etmege qolayca olur», – dep qoştı Qırımtatar Milliy Meclisiniñ reisi.

Evel Qırımtatar Milliy Meclisiniñ Prezidiumı bildirgeni kibi, 2015 senesi yanvar 7-de «Charlie Hebdo» mecmuasınıñ muarriyetinde etilgen terroristik areket çeşit din ve millet vekilleri olğan insanlarnıñ duyğularını aqaretley.

Belli olğanı kibi, çarşenbe künü, yanvar 7-de, «Charlie Hebdo» muarririyetine etilgen ücüm neticesinde 12 insan elâk oldı, 11 yaralandı. Politsiya bergen malümatqa köre, şaatlar ücüm etkenler «Peyğamber içün intiqam aldıq» ve «Allahu akbar» degen şıarlarnı seslendire ediler.

«İslâm devleti»niñ tarafdarları ve diger islâm teşkilâtları saytlarda ücüm mesülietini özlerine alğanı aqqında bildireler.

Frenkistanda musulman toplulığınıñ yetekçileri ücümni takbih ettiler.

«Charlie Hebdo» satirik mecmuası 2006 senesi Jyllands-Posten dan gazetasınıñ Muhammed Peyğamber aqqında karikaturalarnı basıp, populâr oldı.

XS
SM
MD
LG