Link açıqlığı

2015 senesi yanvar 7-de «Charlie Hebdo» mecmuasınıñ muarriyetinde etilgen terroristik areket çeşit din ve millet vekilleri olğan insanlarnıñ duyğularını aqaretley. Bu aqta «Charlie Hebdo» mecmuasınıñ muarririyetine etilgen terroristik ücüm aqqında Qırımtatar Milliy Meclisiniñ Prezidiumınıñ beyanatında aytıla. İşbu beyanat teşkilâtnıñ Facebook saifesinde aşkâr etilgen.

Beyanatta aytılğanı kibi, 12 insannıñ ölümine ve 11 şahısnıñ yaralanuvına ketirgen terroristik ücümniñ teşkilâtçıları ve iştirakçileri yaqalanmalı ve Frenkistannıñ milliy uquqlarına köre, cezalarını körmeli.

«XX asırda Qırımnıñ tamır halqına SSSR kommunistik rejimi tarafından etilgen devlet terrorınıñ facialı aqibetlerini özünde is etken qırımtatar halqı «Charlie Hebdo» mecmuasınıñ elâk olğan hadimlerine taziyelerini bildire. Pariste etilgen cinaiy terroristik areket ve onıñ vahşiy aqibetleri halqara toplulığından terrorizm ve istilânı, şu cümleden, devlet terrorizmni toqtatacaq qararlarnıñ qabul etilmesini talap ete», – denile beyanatta.

Qırımtatar Milliy Meclisiniñ Prezidiumı bildirgeni kibi, insan ve halqlarnıñ aqlarına riayet etilmesi BMT memleket-azaları tarafından BMT Nizamname maddeleriniñ amelge keçirilmesini talap ete.

«Yüz bergen vaqia bizni şaşırdı, terroristik areketiniñ qurbanlarını añamız», – dep bildireler Qırımtatar Milliy Meclisinde.

Belli olğanı kibi, çarşenbe künü, yanvar 7-de, «Charlie Hebdo» muarririyetine etilgen ücüm neticesinde 12 insan elâk oldı, 11 yaralandı. Politsiya bergen malümatqa köre, şaatlar ücüm etkenler «Peyğamber içün intiqam aldıq» ve «Allahu akbar» degen şıarlarnı seslendire ediler.

«İslâm devleti»niñ tarafdarları ve diger islâm teşkilâtları saytlarda ücüm mesülietini özlerine alğanı aqqında bildireler.

Frenkistanda musulman toplulığınıñ yetekçileri ücümni takbih ettiler.

«Charlie Hebdo» satirik mecmuası 2006 senesi Jyllands-Posten dan gazetasınıñ Muhammed Peyğamber aqqında karikaturalarnı basıp, populâr oldı.

XS
SM
MD
LG