«Çetel işler maydanı» hayriye fondunıñ idare reisi Bogdan Yaremenko Qırımda havfsızlıqnı temin etecek akimiyet yoq olğanını tüşüne.
Bunı o Qırım.Aqiqatqa bildirdi.
Yaremenkonıñ fikrine köre, Qırımda energiya, suv, aşaytnıñ ketirilüvi, tren ve avtobuslarnıñ qatnavı kibi suallerni muzakere etmek içün bir kimse yoqtır.
«Anda şimdi yüz bereyatqan adiseler – çirkin bir şey! Anda ne gümrükçi, ne sıñır bekçileri olamaz. O yerde yalıñız Milliy gvardiya ve Ukraina silâlı quvetleri olar bile, çünki bu cebe yolağıdır», – dedi mütehassıs.
O emindir ki, Ukraina Qırımğa nisbeten iqtisadiy qamaçavnı daa da faal qullanmalı – Qırımnıñ qaytaruv tedbirleriniñ qısımlarından biridir.
«Qamaçav – Rusiye Federatsiyası ile işniñ alıp baruv aletidir. Onıñ olmağanına qadar, muzakerelerde biz rusiyelilerge qarşı bir şey kösterip olamamız. Olar Qırımnı zapt ettiler ve onı elinde tutalar, anda Rusiye arbiyleri tura, biz olarnı yoq etip olamaymız», – dep qayd etti Yaremenko.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
