Qırım müftisi hacı Emirali Ablayev Paris merkezinde yanvar 7 künü olğan ziddiyetni takbih etti. Belli olğanı kibi, Charlie Hebdo satirik mecmuasınıñ muarririyetine belgisiz şahıslar kelip, mecmua ve politsiya hadimlerine ateş açtılar.
Bunı Qırım musulmanları diniy idaresi bildire.
Qırım musulmanlarınıñ diniy yetekçisi yarımаdanıñ bütün musulmanları adından Frenkistan halqına ve Charlie Hebdo mecmuasınıñ elâk olğan hadimleriniñ tuvğanlarına taziyelerni bildirdi.
«Bu cinayetniñ nasıldır bir diniy hususiyeti yoqtır, çünki dünyanıñ iç bir dini cinaiy areketlerni alığışlamay, insanlarnıñ öldürüvi aqqında aytmağa acet bile yoq. İslâm ve terrorizm, İslâm ve öldürüv – bir-birine uymağan añlamlar. Qırım musulmanları işbu cinayetni kesen-kes takbih ete ve Frenkistan akimiyeti qatillerni yaqalamaq ve cezalarını bermek içün zaruriy tedbirlerni keçirir dep, ümüt besley. Neşirniñ İslâm aqqında siyaseti iç kimsege insanlarnı öldürmege aq bermey ve cinayetçilerniñ nasıldır diniy duyğuları mezkür areketlerni aqlamaz»,– dedi müfti.
O, İslâmda insannıñ öldürüvi eñ büyük günahlardan biri ve intiqam yasaq olğanını hatırlattı.
Çarşenbe künü, yanvar 7-de, üç silâlı insan Parisde Charlie Hebdo satirik mecmuasınıñ muarririyetine ücüm etti, neticede 10 jurnalist ve 2 politsiya hadimi elâk oldı. Ücümniñ sebebi – islâm diniy timsallerge yapılğan karikutaralar oldı.
Cumaaqşamı künü, yanvar 8-de, Parisniñ cenübinde belgisiz şahıslar ateş açıp, qadın ve politsiya hadimini yaraladılar. Aynı şu künü, saba, Frenkistan şarqında, Vilfranş-sür-Son şeerinde cami yanında yerleşken kebap-qavehanesinde patlav yüz berdi.
