Rusiye müftiler şurası ve Musulmanlarnıñ diniy idaresi Frenkistannıñ Charlie Hebdo satirik ğazetasına yapılğan ücümni aqaretlep, neşirniñ areketlerini de provokatsiya olaraq tanıdılar.
Teşkilât reberligi aytılğan ve bastırılğan sözniñ müimligi, içki tsenzura ve diger medeniyet insanlarına ürmet aqqında unutmamağa çağıra.
Moskvada Frenkistan elçihanesiniñ yanına Charlie Hebdo satirik mecmuasına yapılğan ücüm neticesinde elâk olğanlarnıñ hatırasına çeçek ve çıraqlarnı ketireler.
Frenkistan elçihanesiniñ binası yanında fransızca yazılğan «Frenkistan, biz seniñnen» yazı ile levha ve mecmuada bastırılğan karikaturalar tiklenildi, dep haber ete «Dojd» telekanalı.
Yanvar 7-de Charlie Hebdo muarririyetine ücüm etildi. Ücüm vaqtında 12 insan elâk oldı, şu cümleden baş muarriri de. Şaatlarnıñ aytqanına köre, cinayetçiler «Muhammed peyğamberi içün intiqam alamız», dep qıçıra ediler. Cinayetçiler qaçıp oldılar.
