Qırımnıñ öz başına taiyn etilgen baş naziri Sergey Aksönov yarımada sakinlerini Milât munasebeti ile hayırlar eken, kene de işğal aqqında hatırlattı.
«Allahnıñ yardımı ile Qırım tınç sürette Rusiyege qoşuldı. Halqımıznıñ ruhiy ceetten yañartuvınıñ timsallerinden biridir», – denile Qırım «baş naziri»niñ hayırlavında.
«Biz, qırımlılar, Vatanımıznıñ, vatandaşlarımıznıñ yardımını is etemiz. Aqiqat bizim tarafımızdadır», – dedi Aksönov.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
