Turkish Airlines aviaşirketi yolcuları içün Qırımdan Hersonğa ve keri qatnağan avtobusnı teşkil etti. Aviaşirketniñ müşterileri olmağanlar ayırı ücret boyunca keçeler.
Bu aqta öz Facebook saifesinle qullanıcılardan biri yazdı.
«Herson-İstanbul-Herson seferi ile seyahat etken Turkish Airlines yolсuları içün Aqmescit-Herson marşrutı boyunca transfer teşkil etildi», – denile beyanatta ve em rus, em ukrain telefon nomeraları berilgen.
Qırım.Aqiqatqa aytılğanı kibi, işbu naqliyat aftada bir qaç kere yüre, aviaseferleri olğanda – çarşenbe, cuma, cumaertesi ve bazar künleri.
Mında şunı da qayd ettiler ki, işbu imkânnı yalıñız avaşirketiniñ yolcuları degil de, er kes qullana bile.
«Sizge kerek olsa, sizni de alıp barırmız. Amma evelden telefon açıp, yerlerni ayırtmaq kerek. Yer olsa, Hersondan Aqmescitniñ demir yol vokzalına qadar ve keri ketiremiz», – dep añlattı Qırım.Aqiqatqa adam.
Onıñ aytqanı kibi, yol parası 1500 ruble (tahminen 500 grn) miqdarındadır.
Dekabr 27 künü yolcularnıñ havfsızlığını temin etmek içün «Ukrzalіznitsâ» Qırım yönelişi boyunca qatnağan trenlerniñ marşrutını Novoalekseyevka ve Hersonğa qadar sıñırladı.
Qıtаdan Qırımnıñ Herson vilâyeti ile sıñırına kelgen yolcular cayav ya da toqtağan maşinalar ile Canköy şeerine barıp çıqmağa mecburlar.
