Link açıqlığı

Qırımtatar Milliy Meclis reisi Refat Çubarov öz Facebook saifesinde Rusiye Devlet dumasınıñ deputatı Vladimir Jirinovskiyniñ işğal etilgen Qırımğa Tavrida adını qoymaq teşebbüsini izaatladı.

«Bir qaide kibi oldı: Kreml neni tüşünse, Jirinovskiy onı ayta», – dep yazdı Çubarov.

Bunıñ ile o şunı da qayd etti ki, böyle alda, akimiyet tarafını tutıp, yaqında peyda olğan qırımtatar teşkilâtlarına da adlarını deñiştirmege kerek olacaq eken.

«Şu yerde şunı da qayd etmek kerek ki, çeşit türlü yañı «areketlerge» de acele sürette özlerini nasıldır bir «Tavrida birligi» olaraq adlamağa kerek olur», – dep yazdı Meclis reisi.

Evel Jirinovskiy yarımadanıñ şimdiki adı «tıpqı qırımtatarса» olğanı aqqında bildirgen edi. Rusiye deputatınıñ fikrine köre, yarımada Tavrida yunan adını taşımalı.

2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG