Rusiyede apiske alınğan ukrain arbiyi Nadejda Savçenkoğa halqara qoltutuv internet aktsiyası yanvar 5-te başlana. Onıñ teşebbüsçileri #FreeSavchenko hashtag ile Nadejda Savçenko aqqında malümatnı, foto ve videolarnı çeşit tilde tarqatmağa çağıralar, dep haber ete Radio Svoboda.
Bazarertesi künü ukrain arbiy uçucısı ilân etken açlıqnıñ 22-nci künüdir.
Dekabr 22-de Moskva şeer mahkemesi Nadejda Savçenkonıñ apis müddetini 2015 senesi fevral 13-ne qadar arttırmaq qararını doğru olaraq tanıdı. Böylece, mahkeme Savçenkonı azat etmege talap etken imaye şikâyetini red etti.
Rusiye akimiyeti Savçenkonıñ eki Rusiye jurnalisti İgor Kornelük ve Anton Voloşinniñ ölümine alâqası bar olğanını ayta. Ukrain arbiy hızmetçisi bunı red ete.
Nadejda Savçenkonıñ adliyecileri Rusiye jurnalistleri minaatıcınıñ ateşi altına tüşken vaqıtta Savçenko separatistlerniñ esirliginde bulunğanını tasdıqlağan vesiqalarnı keçken afta berdiler.
Dekabr 15-te ukrain uçucısı oña tibbiy yardım kösterilmegenine qarşı narazılıq bildirmek içün açlıqnı ilân etti.
