Link açıqlığı

İşğal etilgen Qırımnıñ bir çoq supermarketinde raflarda kene de süt mahsulatı körünmey. Qırım.Aqiqat mühbiri bildire ki, Keriçniñ «Furşet», «ATB» ve «Silpo» ticaret ağlarında «süt probleması» qayd etile.

Neşir mühbiri qayd ete ki, ne ukrain, ne de rusiyeli mahsulat bar.

«Furşette» raflarğa Rusiye mahsulatını, şu cümleden sütni qoyğan ediler, lâkin onı tez-tez aldılar. Bala yemekleri de pek az», – dep haber ete Qırım.Aqiqat mühbiri.

Bir çoq tükânda içki de yoq. İş adamlarınıñ aytqanına köre, onıñ satılmasına Rusiye litsenziyası yoq. Bazı supermarketler ise ukrain içkisinden qalğanını sata.

Qırım gümrükhanesiniñ matbuat hızmeti bildirdi ki, 2015 senesi yanvar 1-den itibaren qıtaiy Ukrainadan Qırımğa ketirilgen mal Gümrük İttifağınıñ qaidelerine köre gümrük cedveline yazılmalı.

Bundan evel keçici müddet olğan edi, onıñ çerçivesinde ukrain malı içün gümrük parası alınmay edi.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG