İnternette yılbaş gecesi Qırımnıñ eñ yüksek noqtası olğan Roman Qoşta Ukraina bayrağı tiklengenini köstergen video peyda oldı.
«Qırımnıñ eñ yüksek noqtasında, Roman Qoş töpesinde, ukrain halqına sayğı köstermek içün, ve umumiy tarihımızda eñ yahşısınıñ hatırasına, Rusiyeli bir rus ile Ukraina bayrağı tiklenildi», – dep yazdı video müellifi Aleksandr Poltavskiy.
Videoda levha müellifi «ukrainlilerge terroristlerni quvıp, barışıq qurucılıqqa başlamağa» tiley.
«Men Rusiyede doğdum ve östim. Menim mentalitetim rustır. Lâkin sarı ve mavı renkler yalıñız müsbet duyğularımnı doğura, qırmızı-mavı-beyaz renkler ise menfiy duyğular doğura», – dep ayttı video müellifi qolunda Ukraina bayrağını tutıp.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
