Link açıqlığı

Saatnıñ esas haberi

Qırım iş adamları Nazirler şurası yanında piket ötkerip, olarnı iş yerlerine kirsetmege talap ettiler


«Zalesskiy» çarşısınıñ iş adamları yanvar 5-te Qırım Nazirler şurasınıñ binası yanına piket ile keldiler. Adamlar olarğa ticaret yerlerinde işke devam etmek içün ruhset berilmesini talap etip, Rusiye qanunları boyunca qayd müddetini arttırmağa rica ettiler.

İş adamlarından biri Galina Qırım.Aqiqat mühbirine dedi ki, olarnıñ çoqusı ğayrıdan qayd etilmek içün vesiqalarnı teslim etti, lâkin bergi hızmeti bunıñnen bağlı izin vesiqalarını vaqtında beremedi. Çarşınıñ memuriyeti buña qulaq asmay. Müdirlik ticaret noqtalarını açmağa yasaq etti.

«Men, meselâ, dekabr ayında ğayrıdan qayd olmaq içün vesiqalarnı teslim ettim, lâkin bergi hızmeti izin vesiqalarını bermege yetiştirmedi. Menim vesiqalarnı dekabr 26-da alacağımnı tasdıqlağan spravkam bar, amma olarnı maña bermediler. Çarşınıñ memuriyeti bildirdi ki, yanvar 1-den itibaren vesiqaları olmağanlarğa çalışmağa izin berilmey. Lâkin bu bizim qabaatımız degil, bu meseleni ne içün çezip olamaylar. Bazar – para qazanmağa yekâne imkânım, menim ne nefaqam, ne de başqa işim bar, şimdi ise yanvar 12-ne qadar evde parasız oturmağa mecburım», – dep tarif etti qadın.

Onıñ aytqanına köre, al-azırda «Zalesskiy» bazarınıñ 400 tükânından yalıñız 30 danesi çalışa.

«Bizler Lenin meydanına, Nazirler şurasınıñ yanına, keldik, lâkin yanımızğa saqçılar kelip, anda bir kimse yoq, yanvar 12-ne qadar tatil ve bir kimse bir şeyni al etemeycegini ayttılar», – dedi Galina.

Qadın yanvar 12-den soñ bu meseleni çezecekler, dep şübelene.

«Men pek şübelenem, çünki televizorda bir şeyni aytalar, asılında ise...», – dep açuvlandı iş adamı.

Qırım.Aqiqat bildirgeni kibi, Qırım iş adamlarınıñ ekseriyeti vesiqalarnı Rusiye qanunları boyunca ğayrıdan resmiyleştirmege yetiştirmedi. Böylece, yanvar 1-den itibaren olarnıñ işi yasaq altında qala. Aqmescit bazarlarında bir-eki tükân çalışmaqta.

XS
SM
MD
LG