Ukraina DAİ reberligi işğal etilgen Qırımda Rusiye akimiyeti bergen maşina vesiqaları ve işaretlerini tanımay. Bu aqqında Ukraina içki işler nazirliginiñ GAİ yolbaşçısınıñ muavini bergen resmiy cevapta aytıla, – dep haber ete İnsan aqları boyunca Qırım alan missiyası.
Memur «Ukrainanıñ vaqtınca işğal etilgen topraqlarında vatandaşlarnıñ aq-uquqları ve uquq rejiminiñ temin etüvi aqqında» qanunğa esaslana.
«İşbu qanunnıñ 9-ıncı maddesine binaen, Ukraina qanunlarına zıt kelip, meydanğa ketirilgen organlar qanunsız sayıla. Bunıñ kibi organlar bergen vesiqalar tanılmay», – aytıla vesiqada.
Bundan ğayrı, mektüpte aytıla ki, Qırım Ukraina toprağı olıp qala, mında Ukraina Anayasası ve qanunları işley.
Ukraina yol qaidelerine köre, Ukrainada eki aydan ziyade bulunğan çetel naqliyat vastaları vaqtınca qayd etilmeli.
Ukrainanıñ «Yol areketi» Qanunınıñ 37-nci maddesi qayd etilmegen naqliyat vastalarınıñ qullanmasını yasaq ete. Ukraina GAİ vekilleri bunıñ kibi naqliyat vastasını vaqtınca yaqalay bileler.
Hatırlatamız, 2014 senesi noyabr 14-te Ukraina GAİ yolbaşçısı UNN agentligine dedi ki, Rusiye akimiyeti bergen nomeralar ile maşinalar qıtaiy Ukrainağa kire bileler.
