Link açıqlığı

İşğal etilgen Qırımnıñ para bozduruv noqtaları Rusiye yasağından soñ işini gizlemege başladılar. Yarımadada yañı hızmet peyda oldı – paranı evde bozduralar.

Qırım.Aqiqat mühbiriniñ malümatına köre, Aqmescitte para bozduruv noqtalarınıñ çoqusı resmiy şekilde qapatıldı, lâkin para fiyatlarını yazmayıp, onı gizli-gizli bozmağa azırlar.

Bunıñ kibi noqtalarnıñ vekilleri bildire ki, bu şekilde yalıñız daimiy müşteriler ile iş tutalar.

«Aqmescitte para bozduruv noqtalarınıñ üçte biri qorqa-qorqa işine devam ete. Lâkin olar para fiyatını yazmaylar, noqta çalışmay kibi körüne», – dep ayttı Qırım.Aqiqat mühbirine noqtanıñ hadimi.

Berilgen malümatqa köre, para bozduracaq adamlar çoq degil, bu kene de bayram künlerinen bağlıdır.

Aynı vaqıtta, para bozduruv noqtasınıñ hadimi dey ki, yasaqtan soñ Qırımda evlerde para bozmağa başladılar.

Onıñ fikirince, bugünki vaziyette mezkür hızmet inkişaf etecek.

Qırımlılar Yañı yıldan soñ ve yanvar 3-ten itibaren paranı bozdurıp olamaylar. Rusiye Federatsiyasınıñ qanunlarına köre, para bozduruv noqtaları yalıñız bank bölüklerinde yerleşecek.

2015 senesi yanvar 1-den itibaren yarımadada keçici müddet yekünlendi. Bu vaqıt içinde Qırım ve Aqyar Rusiye Federatsiyasınıñ iqtisadiy, maliye, kredit ve uquq sistemasına alışmaq kerek ediler.

XS
SM
MD
LG