Link açıqlığı

Qırım «baş naziriniñ muavini» Ruslan Balbek Ukraina halq deputatı, qırımtatarlarnıñ milliy lideri Mustafa Cemilevniñ Qırımda yılbaş salütlarınıñ 90% Kiyev saatine köre yanğırağanı aqqında aytqanlarını aynecilik dep adladı. Bunı Balbek RİA Novosti agentligine ayttı.

«Bu siyasiy macera, absurd ve ayneciliktir, bütün mesüliet ile aytam, asılında tam tersi oldı. Qırımlılar yılbaş gecesinde bir oldılar, çünki kendi yekâne prezidenti – Vladimir Putinni – diñley ediler», – dedi Balbek.

Onıñ fikirince, Cemilev bunıñ kibi şeylerni aytıp, bir taraftan – Rusiye cemaatına tolusınen qoşulğan qırımlılar ile bağ üzülgenini tasdıqlay, ekinci taraftan ise – kendi prezidenti Poroşenko ve halqara toplulıqqa yañlış malümatlarnı yetkize.

«Ukraina deputatı Cemilev siyasiy maceranen oğraşıp, prezident Poroşenko ve okeanlarnıñ artında olğan şorbacılarına hızmet etecek ola. Bu şeyler ileride de ukrain siyaset sanasında kerekli olmaq içün yapıla, ileride de halqara teşkilâtlarnıñ mukâfatlarını almaq içün yapıla», – dep tüşüne Balbek.

O, Ukraina akimiyetine Qırım qaytarılması aqqında hayallarnı unutmağa tevsiye ete.

Ukraina prezidenti Petro Poroşenko Facebook içtimaiy ağındaki saifesinde Cemilevniñ mesacına esaslanıp, yılbaş gecesi Qırımda salütlarnıñ 90% Kiyev saatine köre yanğırağanını bildirdi. Bu şekilde qırımlılar Poroşenkonıñ qırımtatarca aytqan hayırlavlarına cevap berdiler, dep qayd etti Cemilev.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG