Qırım akimiyeti repressiyalarğa oğratılğan qırımlılarnıñ raat olmaları içün er şey yapa.
Bunı Qırım «baş naziriniñ muavini» Ruslan Balbek İTV telekanalınıñ «Narodnıy verdikt» yayınında ayttı.
«Bugünde-bugün qırımtatarlar devletniñ işançlı qoruması altında olğanını añlaylar», – dep qayd etti Balbek. Onıñ aytqanına köre, Rusiye prezident Vladimir Putinniñ emri buña büyük isse qoştı. Onıñ sayesinde repressiyalarğa oğratılğan halqlardan «satqın» işareti silindi, dedi Balbek.
Qırım «malümat nazirliginiñ» malümatına köre, Balbek qırımtatarlar ükümetniñ areketlerine bütünley qoltutqanını, şu cümleden Qırım halqlarınıñ birleşmesini desteklegenlerini ayttı. «23 yıl devamında bizler hristian ve musulman bayramlarını qayd etmedik. Eminim, 2015 senesi mayıs 18 siyasetleştirilmeycek, em de facia ve yarımada halqlarınıñ birleşüv künü olaraq qabul etilecek», – dedi Ruslan Balbek.
