2015 senesi yanvar 1-den itibaren Rusiye Federatsiyasınıñ Bergi Kodeksine deñişmeler kirsetile. Endiden soñ MREO GİBDD köstergen hızmetlerniñ fiyatı arta. Bunı «Qırım Cumhuriyeti» boyunca GİBDD MVD İdaresiniñ matbuat hızmeti bildire.
Böylece, maşinalarnıñ devlet qayd işaretleriniñ berilmesi ile bağlı naqliyat vastalarınıñ qayd etilmesi ve diger qayd işleri 2000 rubleni teşkil etecek. Bundan evel aynı hızmet içün 1500 ruble alına edi. Motonaqliyat vastaları, tirkeme, traktor, yol qurucılıq vastalarınıñ devlet işaretlerine 1000 ruble yerine 1500 ruble berilecek.
Naqliyat vastasınıñ pasport fiyatı artıq 500 ruble degil, 800 rubleni teşkil ete.
Naqliyat vastasınıñ qayd şeadetnamesi 500 ruble tutacaq.
Naqliyat vastasınıñ pasport deñişmeleri içün 350 ruble alınacaq.
Aydavcınıñ plastik şeadetnamesi içün 2000 ruble alınacaq.
