Öz dava etmek sevgisi ile belli olğan Rusiye aktörı Aleksey Panin Odessa restoranlarınıñ birinde yerli faaller tarafından tutıldı.
Bunı öz Facebook saifesinde GO «Rada Gromadskoї Bezpeki» ştabınıñ reberi Mark Gоrdiyenko bildirdi.
«Rıba» restoranında oturıp, SBUnı bekleymiz... Aleksey Paninni esirge aldıq. Sözleri içün afu soradı… Afu sözlerini yütüb ağına yüklermiz…», – dedi Gordiyenko.
Onıñ sözlerine köre, aktörnı «militsiya ve SBUğa» teslim ettiler. «O, buña pek quvandı, aslında, o, bahtsız insandır… Aqiqiy degenerat…», – dep qoştı Gordiyenko.
Bunıñ ile qullanıcılardan bazıları faaller Paninge ğayet eyi şekilde davranğanını qayd etip, oña daa da qattı cezanı bermege talap eteler.
Buña ştabnıñ yolbaşçısı böyle cevap berdi: Paninniñ qanı ve çarmuqqa kerüvini istegenlerge… Bunı özüñiz yapa bilesiñiz, o, şimdi Odessadadır. Elimizden kelgenini yaptıq. Turıp, onı restoranda tosmenge tuttıq, subeleştik, insan öz qabaatını tanıdı ve kamerağa bir qaç kere afu soradı, Odessa ve Ukrainadan, onıñ sözlerini biz aşkâr etermiz».
Öz sözlerini tasdiqlamaq içün Gordiyenko bir qaç fotosüretni yükledi.
Belli olğanı kibi, avgust ayında Aleksey Panin ukrain siyasetçilerni «faşist» olaraq adlağanını ve Odessağa kelmege vade etkenini videoğa çıqarğan edı.
Hatırlatamız, 2013 senesi yazda Aleksey Panin Qırımda bulunıp, yol qazasına oğradı. Aktör ekinci aydavcı Elvis Seydaliyevni urdı ve milliy menüspligi boyunca aqaretledi. Bundan soñ Panin qırımtatarlarğa nisbeten yaramay sözlerni aytqan edi. Soñra aktör öz sözleri içün afu soradı, amma Qırımtatar Milliy Meclisinde aktörnı yaqalamağa talap ettiler. Qırım millitsiyası aktörnıñ areketleri sebebinden cinaiy işni açqan edi.
