İşğal etilgen Qırımda yanvarniñ 1-den şeerlerara avtobuslarda yol fiyatı paalılaştı. «Krım Media» haber agentligi bergen malümatqa köre, «Kurortnaya» aqmescit avtostantsiyasınıñ malümat hızmeti aytqanı kibi, Aqmescitten Yaltağa bilet fiyatı şimdi 118 ruble 30 kapik tura. Evelde 75 – 96 ruble edi.
Aqmescitten Aqyarğa qadar barmaq içün 117 ruble (evel – 88 ruble), Keriçke – 300 ruble (280 ruble yerinde) ödemege kerek.
Bundan da ğayrı, Qırımnıñ fiyat ve tarifleri boyunca «Devlet komiteti»niñ avalesine köre, 2015 senesi yanvar 1-den Qırımda yolcularnıñ şeer civarı boyunca avuştıruvı da paalılaştı. Endi 1 km içün 90 kapik (dekabr 31 kününe qadar – 69 kapik edi) ödemege kerek. Yükniñ taşuvı – yol parasından 10%.
Evel qayd etilgeni kibi, 2015 senesi yanvar 1-den Aqmescitte trolleybuslarda yol fiyatı 4,25 rubleden 7-ge arttı. Bunıñ ile şeer civarı ve şeerlerara yürgen trolleybuslarda yol fiyatı da paalılaştı.
