Qırımnıñ naqliyat «nazirligi» işğal etilgen Qırım ile sıñırda kiriş noqtalarına qadar barğan trenler yolcularınıñ ketirilmesini teşkil etti. Bunı Qırım naqliyat «naziri» Anatoliy Tsurkin bildirdi, – haber ete «Novosti Krıma» neşiri.
Onıñ aytqanı kibi, saba, yanvar 2 künü, insanlarnı Novoalekseyevkadan (Herson viyaleti) ketirmege kerek oldı.
«Qırım aydavcıları Novoalekseyevka stantsiyasına Kiyev vaqtı boyunca saat 4,50 (Moskva vaqtı – 5,50) kelgen Harkov-Aqmescit treniniñ 200-den zide yolcusını Canköy şeerine ketirdi», – haber ete Tsurkin.
O şunı da qayd etti ki, yolcularnıñ Çonğar sıñır noqtasına ketirilmesi de teşkil etilgen eken. Bundan da ğayrı, oınñ sözlerine binayen, insanlar Novoalekseyevkağa qadar Aqmescit ve Canköy şeerlerinden doğru avtobus seferleri ile bara bile eken.
Dekabr 26 künü «Ukrzalіznitsâ» Qırım ile demir yol alâqasını toqtattı ve yarımadağa qatnağan halqara trenlerni de lâğu etti.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
