İşğal etilgen Qırımda Rusiye Federal migratsion hızmeti yılnıñ başından elektron pasportlarnı berecek. TASS Rusiye neşiri bergen malümatqa köre, elektron pasportlarnı Krasnodar ve Rostov-na-Donu sakinleri de elde etecek.
Beklenilgeni kibi, Rusiyeniñ diger regionlarında elektron pasportlarını 2017 senesinden bermege başlaycaqlar, 2025 senesinden vesiqanıñ kâğıt şeklini bütünley lâğu etecekler.
«İşbu leyhanıñ esas maqsadı – insan belgileviniñ daa da effektiv ve havfsız usulınıñ kirsetilmesi. Migratsion hızmetinde berilgen malümatqa köre, yañı pasport vatandaşlarğa devlet ve belediye hızmetleriniñ elektron şekilde elde etilmesini teminler», – denile beyanatta.
Elektron pasportnı on yılda bir kere berecekler. Adiy pasportnı deñiştirecek plastik varaqasında onıñ saibi aqqında temel malümat yazılacaq. Soyadı, adı, babasınıñ adı, doğğan künü ve «diger malümatlar».
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
