Qırımtatar Milliy Meclis reisi Refat Çubarov Qırım Ukrainağa barışıq yolu ile qaytarılacağını tüşüne. Onıñ fikrine köre, bu ketişat endi başlanğan eken. Bunı o «24» haber telеkanalınıñ efirinde bildirdi.
«Pessimistlerge şimdi halqara teşkilâtlarda olıp keçken ketişatlarğa diqqatlıca olmağa tevsiye etem, işmar ileri devletlerniñ yolbaşçılarına berile. Er kes Qırımnıñ qaytarılacağı aqqında ayta. Olar Qırım meselesi çezilmeycegine qadar Rusiye belâlarınıñ soñu olmaycağını bildireler», – dedi Çubarov.
«Biz Ukrainanı köteremiz, inkişaf etemiz, dünya bizge ep qol tuta, Rusiye ep zayıflaşa – Qırım ise Ukrainağa qayta. Başqa çare yoq»,– dedi Meclis reisi.
Bundan evel Çubarov 2014 senesi mart ayında Qırım işğaline yol bergen akimiyetke qarşı cinaiy işniñ açılmasına vaqıt kelgenini bildirdi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
