Yañı yılda Ukraina işğalci ve terroristlerden azat etilir, dep bildirdi öz yılbaş muracaatında Ukraina milliy havfsızlıq ve mudafaa şurasınıñ kâtibi Oleksandr Turçinov.
Turçinovnıñ muracaatı SNBO resmiy saytında aşkâr etilgen.
«2014 senesine yekün çeker ekenmiz, özlerini feda etip, Vatanını qorumağa ketken qaramanlarğa teşekkürlerimni bildirmege isteyim. Cesürligiñiz, cesaretligiñiz, özüñiz ve devletiñiz ögünde olğan fedakârlığıñız sayesinde bizni yeñip olamadılar. Biz istilâcını toqtattıq…», – dedi Turçinov.
Onıñ fikrine köre, duşmannı yeñmek içün bütün olğan imkânlarnı birleştirmek kerek.
«İnanam ki, nevbetteki sene memleketimiz işğalci ve terroristlerden azat olunur!» – dedi SNBO başı.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
