Link açıqlığı

Moskvada narazılıq numayışına Aleksey Navalnıy yol aldı, Manejnaya meydanında – faaller ve politsiya


Rusiye Federatsiyasınıñ paytahtı Moskvanıñ Manejnaya meydanında narazılıq numayışı başlana.

Moskva sakinleri içtimaiy ağlarda bildirgeni kibi, Manejnaya meydanında endi bir qaç üz insan toplandı, etrafta bulunğan politsiya sayısı da büyüktir.

Radіo Svoboda Moskvanıñ Manejnaya meydanından canlı yayınnı alıp bara.

Rusiye muhalif siyasetçisi Aleksey Navalnıy numayışta iştirak etecegi aqqında öz twitter saifesinde bildirgen edi.

Belli olğanı kibi, Rusiye muhalifi Aleksey Navalnıy rusiyelilerni soqaqlarğa çıqıp, Rusiye prezidenti Vladimir Putiniñ istifasını talap etmege çağırdı.

O, bunı mahkeme qararından soñ seslendirli, işbu qararğa köre, dolandırıcılıq işi boyunca Navalnıy üç buçuq yıl şartlı qapalma, qardaşı ise – umumiy rejim kolloniyasında 3,5 yıl apis cezasına oğradı, haber ete Radіo Svoboda.

«Bu kibi rejimniñ olması mümkün degil. Onı yoq etmek kerek. Bugün soqaqlarğa çıqıp, anda qabaatsız insanlarnı cezalağan rejim yoq olğanına qadar turmağa çağıram», – dedi Navalnıy.

Onıñ sözlerine köre, Rusiye akimiyeti yalıñız siyasiy raqiplerini yoq etmege degil de, olarğa, tuvğanlarını qıynap, basqı etmege çalışa.

Rusiye muhalif faаlleri mezkür işniñ siyasiy negizi olğanını qayd eteler ve ağa-qardaşnıñ azat etilüvini talap eteler. Saat 19:00 (Kiyev vaqtı boyunca saat 18:00) faaller Moskva merkezindeki Manejnaya meydanına narazılıq numayışına kelecek olalar. Facebookta numayışqa kelecek tahminen 17000 insan endi öz niyetini bildirdi. Tahminen 100 insan mahkeme binasına kelgen edi.

Moskvanıñ Zamoskvortsk mahkemesi ağa-qardaş Aleksey ve Oleg Navalnıylerni «İv Roşe» işi» boyunca qabaatlı olaraq tanıdı. Taqiqatçılarnıñ fikrine köre, Aleksey Navalnıy «Kirovles» devlet şirketinden ve «İv Roşe» frenk kosmetik şirketinden 31 million ruble hırzıslağan eken.

Mahkemeniñ qararına binayen, ağa-qardaş 500 000 ruble (er biri – 8,5 biñ dollar) ve olarnı dolandırıcılıqta qabaatlağan şirketke 4 mln ruble (70 000 dollar) miqdarında tazminatnı ödemek kerektir.

Navalnıy işbu qabaatnı tanımay ve onıñnen qardaşına qarşı olğan işni siyasiy olaraq adlay. Olarnıñ adliyecileri mahkeme qararına itiraz bildirecek olalar.

XS
SM
MD
LG