İşğal etilgen Aqyarda Ukraina tarihı ve Golodomor aqqında kitaplarnı çöplükke atаlar. Bunı salı künü, dekabr 30-da, öz Facebook saifesinde «Lâqayt qalma!» Bütünukrain cemaat teşkilâtınıñ icraiy müdiri Oksana Levkova bildirdi.
Onıñ aytqanı kibi, kitaplarnı tek atmay, olarnı atta yaqa ediler.
«Qırımnıñ rus işğalcileri bu kibi kitaplarnı ğayeviy ceetten havflı olaraq tanıy. Aqyar şeerinde Golodomor (esasen Donbass Açlığı), Holodnıy Yar, Geroyev Krut, ukrain gimni, tuğrası ve diger timsalleri aqqında bütün malümatnı çöplükke ata ve yaqalar. Meraqlası şunda ki, rus edebiyatına rusiyeliler tiymey. Rus tilinde yazılğan er şey olar içün Rusiyelidir», – dep haber etti Oksana Levkova.
«Lâqayt qalma!» Bütünukrain cemaat teşkilâtınıñ icraiy müdiri şunı da qayd etti ki, kitaplarnıñ bir qısmını Aqyardaki teşkilât azasınıñ yardımı ile qurtarıp oldılar.
Evel Oksana Levkova işğal etilgen Qırımda ukrain edebiyatınıñ yoq etilüvi aqqında bildire edi.
Faaller ateşten çıqarılğan kitaplarnı separatistlerden azat etilgen territoriyalarda çalışqan Donbass ocalarına berdi.
«Lâqayt qalma!» Bütünukrain cemaat teşkilâtı doquz yıl devamında çalışa. Teşkilâtnıñ teşebbüsi ile ukrain tili, edebiyatı, medeniyetiniñ saqlanuvı ve inkişafı içün bir sıra tedbirler keçirilgen edi.
2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.
