Link açıqlığı

Yatsenük Qırımnıñ Ukrainağa qaytarıluvı uzun yıllarğa sürecegine ima etti


Ukraina baş naziri Arseniy Yatsenük

Ukraina baş naziri Arseniy Yatsenük Rusiye tarafından işğal etilgen Qırımnı ukrainlilerniñ kelecek nesilleri qaytarıp olacağı aqqında fikrini bildirdi. Bunı o, salı künü, dekabr 30-da, matbuat-konferentsiyasında ayttı, – haber ete UNİAN.

«Qırım ile bağlı geosiyaisiy bir cevap yoq. Yani, Qırımnıñ tez sürette qaytarılacağı boyunca cevap şimdilik yoqtır», – dedi Arseniy Yatsenük.

O, Qırım Ukraina toprağı olğanını da qoşıp ayttı.

«Allah bizge yardım etse, epimiz Qırımnıñ qaytarıluvını körermiz. Aks alda, bunı bala ve torunlarımız yapar», – dedi Yatsenük.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG