Ukraina devlet sıñır hızmeti «Çonğar» nezaret kiriş noqtasını qapatmadı.
Bu aqqında ukrain sıñır hızmetiniñ beyanatında aytıla.
«Devlet sıñır hızmeti bildire ki, Qırım ile memuriy sıñırdaki bütün nezaret noqtaları, şu cümleden «Çonğar» çalışa», – aytıla beyanatta.
Hatırlatamız, Qırım ve qıtaiy Ukraina ile memuriy sıñırda «Çonğar» kiriş noqtasınıñ qapatılması aqqında Ukraina prezidentiniñ Qırımdaki temsilciligi Ukraina Devlet sıñır hızmetiniñ Azaq-Qara deñiz regional idaresine esaslanıp saytında bildirdi.
Qırım.Aqiqatnıñ malümatına köre, dekabr 30-da «Çonğar» kiriş noqtasında, işğal etilgen Qırım tarafından, büyük bir maşina nevbeti peyda oldı.
