Cemaat teşkilâtları qurulsa da, halqnıñ yolbaşçılığında saylanğan temsil organlar – Qırım musulmanları Diniy idaresi ve Qırımtatar Milliy Meclisi – qala.
Böyle etip Qırım müftisi acı Emirali Ablayev «Qırım» regional cemaat areketiniñ meydanğa ketirilmesini izaatladı, dep haber ete Qırım musulmanları diniy idaresiniñ matbuat hızmeti.
O, Meclis azalarına ve Qurultay delegatlarına halq içün mesüliyetini ve 2013 senesi Hanlar sarayında ant etkenlerini hatırlattı.
Dekabr 27-de «Qırım» regionlarara qırımtatar cemaat areketiniñ tesis qurultayı olıp keçti.
«Qırım» areketi esas maqsadlarından biri olaraq «qanun çıqarıcı ve icra akimiyetniñ federal ve cumhuriyet organları, yerli idare organları, siyasiy firqa, cemaat birleşmeleri ile qırımtatar halqınıñ aq-uquqlarını qoruv meseleleri boyunca işbirligini» belgiledi.
Areket teşebbüsçileri, şu cümleden Remzi İlyasov, Qırımtatar Milliy Meclisine qarşı çıqmağanlarını bildireler.
«Qırım» areketi Qırım, Aqyar ve bir sıra Rusiye regionlarında faaliyet köstermege niyetlene: Krasnodar ülkesi, Tataristan Cumhuriyeti, Başkortostan Cumhuriyeti, Rostov-na-Donu, Samara, Moskva, Moskva vilâyeti ve Sankt-Peterburg.
