Donbassta boyeviklerniñ esirliginden 146 ukrainli azat etildi. Bunı Ukraina prezidentiniñ matbuat kâtibi Svâtoslav Tsegolko Facebook saifesinde bildirdi.
«Şimdi SBU yolbaşçısı prezidentke 146 ukrainliniñ azat etilmesi aqqında bildirdi. SBU yarın da 4 esirniñ azat etilecegini bekley. Olarnıñ episi Yañı yılnı ve Milâtnı qorantalarınen beraber qarşılaycaqlar», – dep qayd etti Tsegolko.
Rusiye kütleviy haber vastaları Ukraina tarafı ve boyevikler arasında esirlernen almaştıruv olğanını bildirgen ediler. «İnterfaks» malümatına köre, 150 ukrain arbiyi ve 222 esir alınğan boyevikniñ azat etilmesi planlaştırıla edi. Bundan ğayrı, vaqia yeriniñ fotoresimlerini RT Rusiye telekanalınıñ mühbiri Twitterde qoydı. Fotoda siyasetçi Viktor Medvedçuk da bar.
