Cuma künü, dekabr 26-da, Aqyarda Kapitanskaya soqağı boyunca 16 qatlı evniñ patlavı saat 12:08 yüz berdi. Beklenilgeni kibi, patlavdan soñ bina temelinden yıqılmaq kerek edi, amma olmadı, dep yaza patlavnı canlı yayında köstergen Sevastopolskaya gazeta neşiri.
«Neticede yalıñız birinci beş qat patladı, bina qıyışıp qaldı. Hrustalnıy burnu rayonını toz bastı. Ealide binanı Aqyar Pizan qullesi olaraq adladılar», – dep yaza neşir.
Patlav olğan rayonı alâ daa qapalıdır. Ameliyat arfesinde rayon sakinlerini tahliye etip, naqliyat areketini sıñırladılar.
Gazetanıñ malümatına köre, patlavnı «Alfa Ekspedişn Demayning» Moskva şirketi keçirdi eken.
2014 senesi mayı 11 künü Aqyar «valisi» vazifelerini eda etken Sergey Menâylo «Kapitanskaya soqağı, 12 adresi boyunca qurulıp bitirilmegen obyektniñ devrilmesi aqqında» avaleni imzalağan edi.
