Cumaaqşamı künü, dekabr 25-te, Rusiye Federatsiyasınıñ paytahtı Moskvada Baş prokuratura kirişinde Rusiyede apiste bulunğan ukrain uçucısı Nadejda Savçenkoğa qoltutuv aktsiyası olıp keçti.
Radio Svoboda bildire ki, faaller mavı ve sarı ateş yaqır, «Savçenkoğa azatlıq» dep qıçırdılar.
Aktsiya iştirakçileri «Nadejda Savçenko – Kreml huntasınıñ reinesi» levhasını köterdiler. Bunı bloger Filipp Kireyev «Jivoy jurnal» saifesinde yazdı.
Savçenko Avropa Şurası Parlament assambleyasınıñ Yuqarı Rada eyyeti erkânına kirsetildi. Bu qararnı Ukraina parlamenti tasdıqladı.
Dekabr 22-de Moskva şeer mahkemesi Nadejda Savçenkonıñ apis müddetini 2015 senesi fevral 13-ne qadar arttırmaq qararını doğru olaraq tanıdı. Böylece, mahkeme Savçenkonı azat etmege talap etken imaye şikâyetini red etti.
Rusiye akimiyeti Savçenkonıñ eki Rusiye jurnalisti İgor Kornelük ve Anton Voloşinniñ ölümine alâqası bar olğanını ayta. Ukrain arbiy hızmetçisi bunı red ete.
Nadejda Savçenkonıñ adliyecileri Rusiye jurnalistleri minaatıcınıñ ateşi altına tüşken vaqıtta Savçenko separatistlerniñ esirliginde bulunğanını tasdıqlağan vesiqalarnı keçken afta berdiler.
Dekabr 15-te ukrain uçucısı oña tibbiy yardım kösterilmegenine qarşı narazılıq bildirmek içün açlıqnı ilân etti.
