Rusiyeniñ Sankt Peterburg şeerindeki Primorskiy rayonınıñ alış-veriş merkezlerinden birinde işğal etilgen Qırımnıñ itibarğa lâyıq yerlerniñ miniatüraları taqdim etildi, – dep haber ete TASS.
Neşirniñ malümatına köre, 2 metr kârelik meydanda Bağçasaraydaki Hanlar sarayı, Massandra, Livadiya ve Vorontsov sarayları, Ceneviz qalesi ve «Qarılğaçlar yuvası» yerleştirildi.
Teşkilâtçılarnıñ aytqanına köre, tedbirniñ esas maqsadı – «Qırım ve Rusiyeniñ tarihiy bağını» köstermek, peterburglılarnı Qırımnıñ tarihiy yerleri ve asırlar devamında yarımadada olıp keçken adise-vaqialar ile tanış etmektir.
Bu sene mayıs ayında Sankt-Peterburg Rusiye tarafından işğal etilgen Aqmescit ile işbirlik añlaşmasını imzaladı, Aqyar ise Kronştadtnıñ qardaş şeeri oldı.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
Bundan soñ AQŞ ve Avropa Birligi Rusiyege qarşı bir sıra iqtisadiy cezalarnı kirsetti. Ğarp Qırım Ukrainanıñ bir qısmı olğanını tekrarlamağa devam ete.
