Aqmescit – Cenk zamanında Enver Muhtarovnıñ ailesi em alman işğalcileri, em de Qızıl Ordudan zarar kördi. Başta almanlar Muhtarovlarnıñ evini yaqtılar, soñra da – Qızıl Ordu olarnı Qırımdan sürgün etti.
Sürgünlikten evel Enver Muhtarovnıñ ailesi Qarasuvbazar rayonınıñ Baqsan köyünde yaşay edi. Cenk zamanında almanlar bu köyni yaqtılar. Adamlar mağazalarda yaşamağa mecbur qaldılar. Bu sebepten mayıs 18-de qırımtatarlarnı sürgün etkende Muhtarovlar ve olarnıñ köydeşleri yanına «bir şey alıp olamadılar, çünki aman-aman er şey yanğan edi».
Sabadan evimizge Qızıl Ordunıñ askerleri keldi. «Toplaşıñız, sizni sıcaq ve ötmek olğan yerge alıp ketecekmiz», – dep ayttılar. Evimiz yükseklikte yerleşken edi, oña çıqmaq imkânsız olğanı içün maşina bizni yükseklikniñ eteginde bekley edi. Böyle etip bizni köyden çıqardılar», – dep hatırlay Enver Muhtarov. Sürgün olunğanda o 12 yaşında bir oğlan edi.
Qoranta yanına yalıñız yastıq, yorğan ve tahminen 6 kilogramm qartop aldı. Başqa bir şey yoq edi.
Baqsan qırımtatarlarını demir yoluna alıp ketip, vagonlarğa yüklemege başladılar.
«Yolda pek çekiştik, ne aş, ne de yemek bar edi. Vagonlar bit toldı. Bizni bu vagonlarğa şişege balıqlarnı kibi toldurdılar», – dep tarif ete Enver Muhtarov.
«20 kün sürgen azaplı yoldan soñ aile Özbekistandaki Namangan vilâyetiniñ Kugay köyüne tüşti. Bizler yapacağımıznı bilmey edik, er kes ağlay, açlıqtan qıçıra, bir aftadan soñ bizni yuvunmağa yolladılar», – dep hatırlay Enver ağa.
Başqa qırımtatarlar kibi oğlançıq pamuq toplap, ötmek parasını qazana edi. Qırımğa ise yalıñız 1995 senesi qaytıp keldi.
Şimdi Enver Muhtarov 83 yaşında. O, Aqmescit rayonınıñ Sarabuz qasabasında yaşay.
