Qırım işleri boyunca Rusiye naziri Oleg Savelyev dedi ki, Yañı yılda Qırımda elektrik energiyası kesile bile. Bunı o cumaaqşamı künü, dekabr 25-te, Moskvada bildirdi, – dep haber ete İnterfaks.
«Qorqu er daim bar. Birinciden, bu tehnikiy problemler, em de ukrain energetik sistemasınıñ problemlerinen bağlı ola bile. Onıñ içün er kes ciddiy şekilde vaziyetni közetecek, elbet de, kerek olsa, qazaiy tedbirler de keçirilecek», – dedi o.
Nazirniñ bildirgenine köre, al-azırda «yarımadanı energiyanen temin etmek içün bütün işler yapıldı».
«Eminim ki, yaqın zamanda büzler bunıñ kibi sıñırlarğa rastkelmeycekmiz», – dep qoştı o.
Savelyevniñ qayd etkenine köre, Qırım yarımada iqtisadiyatınıñ inkişafı boyunca federal planğa binaen, 2017 senesiniñ soñuna qadar regionnıñ energetik sisteması mustaqil olacaq.
Malüm ki, dekabr 25-te saba Ukraina Qırımğa berilgen elektrik energiyasını 400 MVtqa qadar sıñırlattı.
Çarşenbe künü, dekabr 24-te, saat 11:20 Qırım ve Aqyar ışıqsız qalğan ediler. Saat 15:00 elektrikler berildi.
Ukraina energetika ve kömür sanayı naziri Vladimir Demçişin bildirdi ki, Qırım yarımadası litimlerni bozğan soñ elektriksiz qaldı.
