Moskva Lefortovo rafon mahkemesi Aqmescitte terroristik areketlerniñ keçirilüvinde qabaatlanğan qırımlı Aleksandr Kolçenkonıñ tevqifni 2015 senesi aprel 16-na qadar uzattı.
Bunı «Mediazona» uquq qoruyıcı areketi bildire.
Böyleliknen, mahkeme taqiqatnıñ muracaatını yerine ketirdi. Neşirniñ malümatına köre, taqiqatçı iş boyunca taqiqat 2015 senesi aprel 28-ne qadar uzanğanına tayandı.
Qırımda faşizmge qarşı küreşken içtimaiy faal Aleksandr Kolçenko 2014 senesi mayıs ayında Aqmescitte apske alınğan edi. Onı Moskvadaki «Lefortovo» SİZOsına yolladılar.
FSB taqiqatçıları onı, ve Qırımnıñ daa üç sakinini, şu cümleden ukrain rejissöri Oleg Sentsovnı, tarihçı Aleksey Çirniy ve adliyeci Gennadiy Afanasyevni terroristik areketler, terakt azırlanması ve silânen qanunsız qullanuvda qabaatlaylar.
Taqiqatnıñ malümatına köre, aprel 14 künü Kolçenko «Yedinaya Rossiya» binasnıñ ateşke berüvinde iştirak etti. İşbu «terrorizm» olaraq adlanılğan areketlerniñ sebebinden pencere yanğan eken.
Kolçenko «Terroristik areket» ve «Terroristik toplulığında iştirak» maddeleri boyunca qabaatlana.
Cumaaqşamı künü, dekabr 25-de, Kolçenko ile birlikte yaqalanğan Gennadiy Afanasyevge 7 yılılq apis cezasını belgilediler.
