Qırımda Rusiye mahsus hızmetleriniñ lagerleri negizinde Donbass içün ücretli askerlerni azırlamağa devam eteler, dep haber ete İnformatsionnoye soprotivleniye gruppasınıñ mütehassısları. Olğan malümatqa köre, işbu askerlerni azırlağanlarnıñ arasında – Ukraina İçki işler nazirliginiñ İçki ordularınıñ sabıq komandanı da bar.
«İS cenübiy bölügi bu kibi lagerlerniñ birinde komandanlıq etken şahısnı belgiledi – Ukraina İçki işler nazirliginiñ İçki ordularınıñ sabıq komandanı general-leytenant S. Şulâk. Onıñ 2014 senesi fevral ayında Maydanda vatandaşlarnıñ kütleviy sürette öldürüvine alâqası olğanı sebebinden, o, Ukraina Baş prokuraturası tarafından qara cedvelge kirsetilgen edi», – dey Tımçuk.
Matbuat vastalarınıñ malümatına köre, 2012 senesi mayıs 31 künü prezident Viktor Yanukoviçniñ emri ile Şulâk baş idareniñ yolbaşçısı – Ukraina İçki işler nazirliginiñ içki ordularınıñ komandanı olaraq tayinlendi. 2013 senesi yüz bergen Maydan vaqialarından soñ Qırımğa qaçıp ketti.
