Ukraina yırcısı, qırımlı Camala, dekabr 24 künü Kiyevde işğal etilgen Qırım ve Donbasstan köçip kelgenler ile körüşti. Körüşüvniñ teşkilâtçısı cemiyet teşebbüsi Krım-SOS oldı.
Qırım.Aqiqat mühbiri bergen malümatqa köre, Qırım ve Donbasstan köçip kelgenler ile körüşüvde Camala muzıka, icadiy planları, qorantası aqqında tarif etti, insanlarnıñ suallerine cevap berdi, balalığında olğan adiselerni hatırladı.
«Arzu etmege sevem. Şimdi eñ büyük arzum, – bunı can-yürekten aytam, – epimizniñ evlerimizge qaytıp, anda özümizni evde olğanı kibi is etkenimizni isteyim: raat, bir şeyden qorqmadan, şimdi bu ne qorqunçlı körüne. 21-ncı asırdа Ukrainada insanlar öz ayatı içün qasevet çekecegini kimse tüşünmegen edi. Şunıñ içün – bu pek büyük bir arzum ve onıñ amelge keçmesini ve memleketimizde barışıq olğanını isteyim», – dep ayttı Camala.
Camala şunı da qayd etti ki, Ukrainada fikirrdeşlik olğanını da ister edi.
«Biz añlaşırmız. Em Ğarp, em Şarq. İnsanlar er vaqıt bir-birini añlay edi, çeşit yollar ile: söz, muzıka, sanaat ile, – farqsız. Eñ esası – añlaşmaq», – dedi yırcı.
Körüşüvniñ soñunda , Camala köçip kelgenler ile «selfi» çekti.
Evel, dekabr 12 künü, Camala StereoPlaza salonında kontserti ile çıqışta bulundı. Zalda bulunğan seyircilerden çoqusı Qırım ve Donbasstan köçip kelgenler edi. Olar kontsertke Krım-SOS cemiyet teşebbüsinden elde etken bedava davetnameleri boyunca keldiler.
