Link açıqlığı

Saatnıñ esas haberi

Balbek Qırım işğaline «issesini qoşqan» sekiz qırımtatarına medal berdi


İşğal etilgen Qırımnıñ «Nazirler şurası» reisiniñ muavini Ruslan Balbek «2014 senesi mart 16-da bütünqırım referendum keçirilmesiniñ havfsızlıq temininde ve vatandaşlarnıñ aq-uquqları ve ömrüni imaye etüv ile bağlı diger tedbirlerde kendini köstergen» sekiz qırımtatarına «Qırımnıñ qaytarılması içün» medalni berdi.

Bunı Qırım ükümetiniñ matbuat hızmeti bildire.

Ruslan Balbek medallerni berip, qırımtatarlar «Qırımnı Rusiyege qaytarmaq tedbirleriniñ keçirilmesine isse qoşqanlarını» bildirdi.

Qırım ükümeti matbuat hızmetiniñ beyanatına köre, Redvan Abduramanov, Ali Calilev, Sultaniye Yemelyanova, Şevket Mametov, Nurfet Murahas, Seita Seitmemetova, Rustem Suleymanov ve Musa Seitmemetov medalini aldılar.

Tedbir Rusiye prezidentiniñ Qırımdaki vekâletli temsilcisiniñ rezidentsiyasında olıp keçti.

Mukâfat buyruğını Rusiye Federatsiyasınıñ mudafaa naziri Sergey Şoygu imzaladı.

2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG