Link açıqlığı

Minskte kontakt gruppasınıñ körüşüvi keçirilmekte


Çarşenbe künü, dekabr 24-te, Minskte Donbass zıddiyetini al etüv boyunca üç taraflı kontakt gruppasınıñ körüşüvi başlandı. Muzakereler qapalı şekilde keçirile, – dep haber ete Radio Svoboda.

Körüşüvge mahsus vekil Heidi Tagliavini yolbaşçılığında OSCE eyyeti, Ukrainanıñ ekinci prezidenti Leonid Kuçma, Ukrainada Rusiye elçisi Mihail Zurabov ve «DNR» ve «LNR» gruppirovkalarınıñ vekilleri Denis Puşilin ve Vladislav Deynego keldiler.

Heidi Tagliavini bildirgenine köre, körüşüvde er bir tarafnıñ ateş toqtatılması, ağır tehnika çekilmesi, esir alınğan adamlarnıñ azat etilmesi, boyevikler zapt etken topraqlarğa gumanitar yük yetkizmesi muzakere etilecek.

Ukraina tışqı işler naziri Pavlo Klimkin dedi ki, bu körüşüvniñ esas mevzusı Minsk añlaşmalarına riayet etüv olmalı.

Separatistlerniñ temsilcileri ise bu körüşüvde «Donbassnıñ hususiy statusı aqqında» mesele baqılacağını bildirgen ediler.

Ekinci körüşüv dekabr 26-da ötkerilmeli.

Sentâbr ayında olıp keçken Minsk mesleatlarınıñ eki basamağından soñ barışıq aqqında añlaşma tizildi, lâkin onı yüz kere bozdılar. Neticede biñden ziyade insan elâk oldı. Dekabr ayında Ukraina şarqında cenk areketleri biraz tındı.

Dekabr 24-te ve 26-da Minskte kontakt gruppasınıñ toplaşuvını keçirmek qararı Ukraina prezidenti Petro Poroşenko, Almaniya kantsleri Angela Merkel, Frenkistan prezidenti François Hollande ve Rusiye prezidenti Vladimir Putinniñ telefon subeti vaqtında qabul etildi.

XS
SM
MD
LG