Link açıqlığı

Ukraina tışqı işler nazirligi: Rusiyeniñ Qırımnıñ USSR terkibine qoşulmasını lâğu etmek ıntıluvları – uquq ceetinden sıfırğa teñ kele


Ukraina tışqı işler nazirligi Rusiyeniñ 1954 senesi Qırımnıñ Ukraina SSR terkibine qoşulmasını lâğu etmek ıntıluvlarını uquq ceetinden sıfır olğanını tüşüne. Bunı MİD informatsion siyaseti departamentiniñ müdiri Yevgeniy Perebiynis brifingde bildirdi, – dep haber ete RBK-Ukraina.

Onıñ aytqanına köre, Rusiyeniñ böyle bir qanun leyhası qabul etilse, uquq ve halqara uquq ceetinden bir şeyge yaramaycaq, çünki Rusiyeniñ iç bir yañı qanunı Rusiye imzası olğan bir çoq vesiqa ve Qırımnıñ Ukrainağa ait olğanını tasdıqlağan vesiqalarnı lâğu etemez.

Malüm olğanı kibi, Rusiye Federatsiya şurası bir zamanları Qırımnıñ Ukraina terkibinde bulunmasını qanunsız olaraq tanığan qanun leyhasını azırlay. Bunı dekabr 22-le Rusiye parlamenti yuqarı palatasınıñ spikeri Valentina Matviyenko Rusiye prezidentiniñ Federal Keñeş palatalarınıñ vekilleri ile körüşüvinde bildirdi.

Ukraina prezidenti Petro Poroşenko dekabr 17-de Poloniya parlamentinde çıqışta bulunıp, Qırım üzerinde Ukraina bayrağı dalğalanacağına ümüt etkenini bildirdi.

2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

XS
SM
MD
LG