İşğal etilgen Qırım «Devlet şurasınıñ» deputatları cumhuriyet paytahtı aqqında qanunnı soñki oquvda qabul ettiler. Bu statusnı Aqmescit aldı. Bu aqqında dekabr 24-te TASS bildire.
Qanunğa köre, Qırım paytahtı yarımadanıñ memuriy, siyasiy, iqtisadiy, medeniy-tarihiy, ilmiy-maarif merkezi ola. Al-azırda Aqmescitte «Qırım devlet akimiyetiniñ organları, icra akimiyet federal organlarınıñ territorial organları, çetel devletler, Rusiye Federatsiyası ve halqara teşkilâtlarnıñ temsilcilikleri» yerleşe.
Qırım paytahtınıñ vazifeleri olaraq federal ve cumhuriyet obyektleri ve müessiseler faaliyetiniñ temin etilmesi, transport infrastrukturasınıñ inkişafı ve tertip-nizam tedbirleri belgilendi. Qanunğa köre, bu vazifelerniñ amelge keçirilmesine cumhuriyet bücetinden para ayırılacaq.
«Qanunnıñ qabul etilmesi böyle bir status olmağanınen bağlıdr. Aqmescit paytaht sayıla edi, lâkin bu iç bir yerde belgilenmegen edi. Bizim içün bu yañı bir şeydir», – dedi Aqmescit memuriyetiniñ yolbaşçısı Gennadiy Baharev.
Aynı vaqıtta, neşirniñ qayd etkenine köre, qanun ileride başqa şeer paytaht olmasını red etmey.
«Devlet şurasınıñ» qanunlar komitetiniñ reisi Yefim Fiks dedi ki, Qırım anayasasına belli bir deñişmeler kirsetilse ve referendum keçirilse, paytahtnı deñiştirmege imkân olacaq.
2014 senesi fevral soñunda mart başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.
2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.
