Rusiye Federatsiyasınıñ energetika nazirligi Ukraina tarafı ile muzakereler keçirdi, bunıñ neticesinde Qırımda elektrik temini yañıdan tiklenildi, dep bildirdi Qırım yaqarlıq ve energetika «naziri» Sergey Yegorov jurnalistlerge.
Bunı Qırım «ükümetiniñ» matbuat hızmeti bildire.
Onıñ aytqanına köre, Ukraina Qırımnı apansızdan elektrik energiyasız qaldırğan soñ yarımadada mobil gazoturbin elektrik stantsiyaları acele sürette işke başladı.
«Muzakerelerden soñ Ukrainadan Qırımğa elektrik berilmesi yañıdan tiklenildi. Şimdi Ukrainadan berilgen elektrik energiyası tahminen 500 Mvtnı teşkil ete», – dep ayttı Yegorov.
Çarşenbe künü saba Qırım bütünley ışıqsız qaldı. Yolda çalışmağan ışıqlardan sebep uzun tıqanıqlıqlar peyda oldı, qazalar yüz berdi. Telefon bağı da üzüldi.
Qırım yaqarlıq ve energetika «nazirligi» Ukraina yarımadanı ışıqsız qaldırdı, dep bildirdiler.
Ukraina energetika ve kömür sanayı naziri Vladimir Demçişin bildirdi ki, Qırım yarımadası litimlerni bozğan soñ elektriksiz qaldı.
Qırımnıñ öz başına ilân etilgen baş naziri Sergey Aksönov dekabr 23-te matbuat konferentsiyasında çıqışta bulunıp, Rusiye ve Ukraina arasında tizilgen añlaşmalarğa köre yarımada elektriksiz qalmaycaq, dedi.
