Link açıqlığı

Saatnıñ esas haberi

Rusiyede Qırım siyasiy mahbüsleriniñ apis cezasını arttırmaq içün mahkemeler keçirilecek


Rusiyede Qırımnıñ siyasiy mahbüsleri Oleg Sentsov ve Aleksandr Kolçenkonıñ apis cezalarını arttırmaq içün mahkeme toplaşuvları ötkerilecek.

Adliyeci Svetlana Sidorkina Qırım.Aqiqatqa bergen malümatına köre, dekabr 25-te Moskvanıñ Lefortovo rayon mahkemesinde Aleksandr Kolçenkonıñ cezasını belgileycek toplaşuv ötkerilecek.

«Şübesiz, taqiqatçılar onıñ «Lefortovo» SİZOsında apis altında qalmasını isteycekler. Taqiqat işleri keçirilemi-yoqmı ve işniñ mahkemege berilecek vaqtı – belli degil, çünki adliyeciler malümatnı aydınlatmamaq kerekler», – dedi adliyeci.

Al-azırda mahkeme çıqarğan qararğa köre, Kolçenko 2015 senesi yanvar 16-na qadar apiste bulunacaq.

Bundan ğayrı, dekabr 26-da Aqmescitniñ Kiyev rayon mahkemesinde adliyeci Sidorkinanıñ Aleksandr Kolçenkonıñ Ukraina vatandaşlığını saqlamaq aqqını tanuv arizası baqılacaq.

Moskva SİZOsında bulunğan ukrain rejissöri Oleg Sentsovnıñ tatası Natalya Kaplina Facebook saifesinde bergen malümatına köre, Lefortovo rayon mahkemesi cuma künü, dekabr 26-da, qardaşınıñ apis müddetini belgileycek.

Mayıs ayında FSB hadimleri Aqmescitte Oleg Sentsov ve Aleksandr Kolçenkonı, em de Ukrainanıñ daa bir qaç vatandaşını yaqaladılar. Olarnı Qırımda terakt azırlanmasında qabaatlaylar.

Sentâbr 29-da Moskvanıñ Lefortovo rayon mahkemesi onıñ apis müddetini üç ayğa arttırdı – 2015 senesi yanvar 11-ne qadar. Oktâbr 24-te Moskva şeer mahkemesi Sentsovnıñ apis müddetini arttırmaq qararını doğru dep tanıdı.

Qırımlılarnıñ adliyecileri deyler ki, apis cezası sebepsizdir.

XS
SM
MD
LG