Link açıqlığı

Saatnıñ esas haberi

Nevbet, qavğa, qabar – Qırım «sıñırındaki» vaziyet kerginleşe


İşğal etilgen Qırım ve qıtaiy Ukrainanıñ memuriy sıñırında maşinalar nevbetleri tura, bazı adamlar qavğa eteler. Böyle bir vaqianıñ şaatı Qırım.Aqiqat mühbiri oldı.

Böylece, bu künleri Qırım kirişinde qıta tarafından maşinalar nevbeti 11 kilometrni teşkil etti, biñden ziyade maşina tıqanıqlıqqa oğradı.

Ekseriy allarda yük maşinaları ve qıtaiy Ukrainadan sebze ketirgen mikroavtobus aydavcıları arasında qavğa yüz bere.

Böylece, dekabr 22-de Kalançakta yük maşinasınıñ aydavcısı pek açuvlandı – o, beş kündir nevbette turıp, yol ortasına maşinasını qoydı ve yolnı qapattı. Başqa aydavcılar buña açuvlanıp, qavğa etip başladılar. Bunıñ neticesi yük maşinası camınıñ parlatması oldı.

Ukraina sıñırcılarından yardım istediler, olar ise militsiyanı çağırmağa tevsiye ettiler.

Qırım.Aqiqat mühbiri qabarcılıqnıñ şaatı oldı. Böylece, Odessadan Qırımğa qıyafetlernen ketken 11 qadın ukrain sıñırcılarına para berip, nevbetsiz keçtiler, qalğanları da açuvlandılar.

Adamlarnıñ aytqanına köre, bunıñ kibi vaqialar sıq-sıq qayd etile. Bir kün içinde tahminen qırqı maşina aynısın yapıp keçe, er birinden biñer biñ grivna alına.

KPP noqtasında böyle bir problemler yoq, nevbetler bile yoq, vesiqalarnı tez-tez teşkereler, bundan soñ aydavcılar Qırımda Rusiye sıñırcılarınıñ kontrolinden keçeler.

«Sıñırcılar bayram arfesinde nevbetler tizip, para qazanalar, dep tüşünemiz», – dep ayttı iş adamı Susanna Qırım.Aqiqat saytına.

Ekinci aydavcı dedi ki, künlerdir nevbette turğan adamlar ateş yaqıp, anda aş pişireler.

«Duş ya da kenef kibi bir de bir şaraitler aqqında aytmayıq», – dep ayttı yük maşinasınıñ aydavcısı Sergey.

Ukraina devlet sıñır hızmeti bildirdi ki, dekabr 23-te saba yarımağa «Kalançak», «Çaplinka» ve «Çonğar» nezaret noqtalarından ketken yük maşinalarınıñ sayısı 400 maşinanı teşkil etti.

Hızmetniñ malümatına köre, bunıñ sebebi yalıñız yañı yıl bayramları degil, yanvar 1-den itibaren qıtaiy Ukrainadan kelgen er bir mal cedvelge kirsetilmesinen bağlıdır.

Qırımğa ketken bütün vatandaşlar er bir mevzu boyunca gece-kündüz çalışqan «acele ağ» ile bağalana bileler: (044) 527-63-63.

XS
SM
MD
LG