Ukrain yırcısı, qırımlı Camala işğal etilgen Qırım ve Donbasstan köçip kelgen insanlarnen dekabr 24-te Kiyevde körüşecek.
Bu aqqında tedbir teşkilâtçıları olğan Krım-SOS cemaat teşebbüsi bildire.
«Yırcı ömür ve icat yolu aqqında tarif etecek. Musafirler sual berecekler, Jamala ise kimden ve neden ilham alğanını aytacaq, «Povodır» filminden alğan tecribesinen paylaşacaq. Körüşüv çerçivesinde yırcı imzasını berecek», – dep qayd eteler teşkilâtçılar.
Tedbir Kiyevdeki Smolenskaya, 31-33 adresi boyunca «İnkom» biznes-merkezinde ötkerilecek. Yerli saatine köre saat 19-da başlanacaq.
Dekabr 12-de Jamala Kiyevdeki StereoPlaza kontsert zalında kontsertini keçirdi. Musafirlerniñ çoqusı Qırım ve Donbasstan köçip kelgen insanlar edi. Kiriş serbest oldı.
