Link açıqlığı

İşğal etilgen Qırımnıñ öz başına tayin etilgen baş naziri Sergey Aksönov Ukraina yolbaşçılığınıñ yarımadanı özüne qaytarmağa istegini saçmalıq olaraq adlaу ve regionnıñ havfsızlığına iç bir telüke körmey eken.

Bunı o dekabr 23 künü Aqmescitte keçirilgen matbuat konferentsiyasında bildirdi, dep haber ete Qırım.Aqiqat mühbiri.

«Havfsızlıq tarafından baqacaq olsaq, bugün cumhuriyette iç bir telüke yoqtır. Cumhuriyet territoriyasında silâlı quvetlerniñ miqdarı yeterlidir… Küreşmek içün kimse yoq. Ukraina bugün Rusiye Federatsiyasına ücüm etip olamaz. Dünyada bile böyle memleket yoq (Rusiyege ücüm ete bilecek), em de bunı yamağa kimsege tevise etmeyim – er kes cezasını körer… Qırımlılar raat yuqlay bile»,– dedi «baş nazir».

Aksönovnıñ aytqanı kibi, Ukraina akimiyeti Qırımnıñ qaytarıluvı aqqında tüşünceleri ile «öz-özüni tınçlandıra».

«Planlarnı izaatlamağa bile istemeyim – saçmalıq»,– dedi o

Ukraina prezidenti Petro Poroşenko diplomatik eyyet reberleri ve çetel memleketler temsilcileri ile adetiy körüşüvi vaqtında Ukraina iç bir vaqıt Qırım işğali ile razı olmaz ve, tarihiy adalet pekitilmegence, küreşi devam etecegini bildirdi.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG