Link açıqlığı

«Sebat» qırım «narazılıq meydanları»nda qanunsız sürette aqça toplağanında qabaatlana


«Sebat» cemaat teşkilâtınıñ azalarını Qırım «narazılıq meydanlarında» qanunsız sürette aqça toplağanında qabaatladılar. Bu aqta işbu «narazılıq meydanları»nıñ temsilcileri dekabr 22 künü Aqmescitte keçirilgen konferentsiyada bildirdiler, dep haber ete Qırım.Aqiqat mühbiri.

Şu cümleden, Aqmescit rayonında Dubki köyünde «narazılıq meydanı»nıñ iştirakçisi olaraq özüni tanıtqan Remzi Aşirov Aqmescit rayonınıñ uquq qoruyıcı organlarına mezkür mesele boyunca endi 20 ariza berilgeni aqta bildirdi.

«Fikrime köre, daa yüzden ziyade muracaat olur. İnsanlar kütleviy sürette kete, aqça qanunsız sürette toplanğanı aqqında arizalarnı yazalar. Aqça belgisiz bir yerge yoq oldı. Aqça nege masraf etildi kibi sualge añlaşılmağan cevaplar berille. Demek, para dolandırıcılar tarafından saipleştirildi. Bunı al etmek kerek», – dedi Aşirov.

Şunı qayd etti ki, aqçalarnı Kiyevde keçken narazılıq numayışlarına toplay ediler, amma masraflar aqqında esabatnı kimse bermey edi.

Nikolayevkada «narazılıq meydanı»nıñ büyügi olaraq özüni tanıtqan Asan İzzetdinov «Sebat» cemaat teşkilâtından zarar körgen» qırımtatarlarğa Qırımnıñ milletlerara munasebetleriniñ «Devlet komitetine» muracaat etmege tevsiye etti.

Bunıñ ile Aşirov matbuat konferentsiyasından evel onı «Sebat» azaları qorqutmağa areket etkenini bildirdi.

«Mında oturıp, kendi ve tuvğanlarımıznıñ yaşayışını telüke altına ketiremiz»,– dedi o.

«Sebat» matbuat hızmetiniñ temsilcisi Suleyman Yakubov Qırım.Aqiqatqa bütün bu malümatnı saçmalıq olaraq adladı.

Onıñ aytqanı kibi, Asan İzzetdinov ve matbuat konferentsiyasında bulunğan Dilâver Alimov «narazılıq meydanları»nıñ iştirakçileri olmay eken.

«Bu insanlarnı Daniyal Ametov («narazılıq meydanlarınıñ» sabıq iştirakçisi, «Selâm» diniy cemiyetiniñ imamı, «Samozahvatlarnıñ qıralı» kibi belli olğan – muar.) topraq damartları ile keçirgen aldavları sebebinden quvğan edi. Olar tahminen 40 damartanı gizlediler. «Sebat» tarafından aqça toplanılğanı aqqında aytacaq olsaq, bir saçmalıqtır, çünki biz iç bir vaqıt «narazılıq meydanları»nıñ iştirakçilerinden aqça almay edik. İç olmağanda, göñülli sürette bere ediler…Aqça daa «Avdet» teşkilâtı vaqtında toplanıla edi: biz Yuşçenko zamanında eki afta Kiyevde edik, 100 kün Yuliya Vladimirovnada, tahminen 40 kün – Yanukoviçte, umumen ise 200 kün Kiyevde bulundıq. Buña aqça toplanğan edi, amma o vaqıt daa başqa teşkilât edi. Sualler olsa bile, bizim alâqımız iç te yoq. Biz aqça cıymadıq», – dedi Yakubov.

Dekabr 22 künü Aqmescitte «Sebat» cemaat teşkilâtınıñ vekilleri matbuat-konferentsiyasını keçirdiler. «Narazılıq meydanlarınıñ» iştirakçileri topraq meselesiniñ çezilmesi boyunca Qırım «Devlet şurasına» muracaat yazğanlar.

XS
SM
MD
LG