Link açıqlığı

Saatnıñ esas haberi

Moskvada TASS fotosergisinde Rusiye tarafından Qırım işğaliniñ fotoresimlerini kösterdiler


Rusiye Federatsiyasınıñ paytahtı Moskvada dekabr 22 künü Tverskiy caddesinde «Hatırlavlar. 2014 senesi TASS fotoresimlerinde» serlevalı sergi açıldı. Sergide Rusiyede keçken seneniñ eñ parlaq adiseleri aks etile.

Fotoresimler arasında – Rusiye tarafından Qırım işğalini ve işğal etilgen Aqyarda mayıs 9 künü Ğalebe marşını aydınlatqan resimler de bar.

«İşbu serginiñ negizidne – TASS Fotohronikasınıñ 2014 senesi yapılğan eñ parlaq, acayıp ve duyğulı resimleri. Keçken seneniñ eñ müim vaqialarını aydınlatqan ve mündericesi, üslübi boyunca bir-birinden farqlı olğan resimler taqdim etilgendir», – dep yaza neşir.

Bunıñ ile eksponatlarnıñ arasında – Soçide keçirilgen Olimpik ve Paralimpik oyunları, Moskvanıñ Qızıl meydanında mayıs 9 künü keçirilgen Ğalebe marşı, Rus adasında İvan Kupala Kününiñ qayd etüvi, teatr festivalleri ve sport yarışlarını aks etken resimler bardır.

Bildirilgeni kibi, sergi 2015 senesi fevral 15-ne qadar işine devam etecek.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG