Link açıqlığı

Rusiye Federatsiyasınıñ Şurası Qırımnıñ Ukraina terkibinde olğanını qanunsız olaraq tanıtacaq qanun leyhasını azırlay. Bunı dekabr 22 künü Rusiye parlamentiniñ yuqarı palatasınıñ spikeri Valentina Matviyenko Rusiye prezidentiniñ Federal palatalarınıñ temsilcileri ile körüşüvinde bildirdi, – haber ete TASS.

«1954 senesi Qırım vilâyetiniñ RSFSC terkibinden Ukrain SSCne teslim etüvi aqqında qararlarnıñ talilimiz işbu areketniñ qanunsızlığını aks ete. Bu qararlar anayasa ve qanunlarnıñ bozuluvı ile qabul etildi. Şunıñ içün Federatsiya Şurasında Qırımnıñ teslim etüvini qanunsız olaraq bildirecek qanun leyhasını azırlamağa başladıq», – dedi Matviyenko.

O şunı da qayd etti ki, senatorlar «Ukraina cenübiy-şarqındaki vaziyetke büyük diqqat ayıra» eken.

2014 senesi fevralniñ soñunda martnıñ başında Rusiyeden ve Rusiye Qara deñiz flotunıñ qırım bölüklerinden atılğan ordular Qırım yarımadasını işğal ettiler.

2014 senesi mart 16 künü Qırım ve Aqyarda yarımadanıñ statusı aqqında «referendum» keçirildi. Onıñ neticesinde Rusiye Qırımnı öz terkibine qoştı. Ne Ukraina, ne Avropa birligi, ne de AQŞ neticelerni tanıdı ve bunı Rusiye tarafından Qırımnıñ işğali olaraq sayalar.

Bundan soñra AQŞ ve Avropa Birligi Rusiyege qarşı bir sıra iqtisadiy cezalarnı kirsettiler. Ğarp Qırım Ukraina olğanını ayta.

XS
SM
MD
LG